ЗÆРДÆВÆРÆН

Мæрдты бон, вæййы уалдзæджы кæрон кæнæ сæрды райдайæны.

Чырыстон дин Ирыстоны чи парахат кодта, уыдон архайдтой ирон бæрæгбæтты чырыстонты бын фæкæныныл. Гъе, уый аххосæй ирон бæрæгбон Куадзæн (комуадзæн) ссис чырыстон дины Чырыстийы райгасы бон. Æмæ йæ бæрæг кæнын райдыдтам чырыстон дины къæлиндармæ гæсгæ. Уымæй дыууиссæдз боны куы рацæуы, уæд та вæййы Зæрдæвæрæн. Уымæй алы хатт дæр — цыппæрæмы. Зæрдæвæрæн у мæрдты бон. Йæ мидис ын ирон адæм алыхуызон æмбарынц, бæрæг дæр æй кæнынц, кæм куыд, кæм куыд. Фæлæ алы ран дæр баст у мæрдты, суанг зæронд мæрдты дæр æрымысынимæ, уæлмæрдтæ бадзæбæхтæ, цыртытæ саив кæнынимæ. Ног, ома, афæдзы дæргъы чи амард, уыдоны ингæнтыл нæуцъар сæвæрынц. Бирæтæ йын йæ ном Зæрдæвæрæн дæр бæттынц нæуу æвæрынимæ. Дыгуронау, дам, нæуу зæлдæ у, æмæ ног ингæнтыл нæуцъар кæй февæрынц, уымæ гæсгæ йæ ном у Зæлдæвæрæн — Зæрдæвæрæн.

Иннæтæ та йын йæ номы хъусынц «зæрдæ» æмæ уыцы боны кусарты зæрдæ хæссынц уæлмæрдмæ. Уым æй баныгæнынц ног марды уæлмæрдыл. Чидæртæ ма æрмæст зæрдæ нæ ныгæнынц, фæлæ кусарты къах, стæй ногахст кæсæгтæ дæр. Кæй зæгъын æй хъæуы, уый раст нæу. Æвæццæгæн, Зæрдæвæрæн ирон адæм тынг рагæй бæрæг кæнынц, æмæ рагæй дæр баст уыд мæрдтимæ, фæлæ йæ куыд хуыдтой, уый абон зын зæгъæн у. Ном Зæрдæвæрæн та комкоммæ баст у Есо Чырыстиимæ. Уый Куадзæны райгас æмæ 40 боны фæстæ Зæрдæвæрæны уæларвмæ куы цыд, уæд йæ ахуыргæнинæгтæн зæрдæ бавæрдта, иунæгæй сæ кæй нæ ныууадздзæн, кæй сæм ‘рыздæхдзæн, уымæй.

кæс «АРВЫ ДУАР»-Ы СÆРГÆНДТÆ